Plantun de Prouvènço

Pèr coumpara dos planto d'encò nostre

Cenchrus longispinus & Plumbago europaea

Cenchrus longispinus

Poaceae Graminaceae

Nom en français : Cenchrus.

Descripcioun :
Aquesto erbo, que nous vèn d'Americo troupicalo e d'uba ("Sandbur"), a planta caviho dins quàuqui relarg sablous de vigno dins lou nord de Vau-cluso. Se recounèis eisadamen à si pichot fru espinous coume de castagno, que podon rintra dins la car e faire mau ! Pèr li paisan es un flèu subretout que soun pas eisa à derraba e nimai à manja pèr li bèsti.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 30 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Cenchrus
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 1 à 2 cm
Flourido : Estiéu - Autouno

Sòu : Ca
Autour basso e auto : 0 à 500 m
Aparado : Noun
Setèmbre à óutobre

Liò : Vigno sablouso
Estànci : Mesoumediterran
Couroulougi : Óurigino Americo troupicalo
Ref. sc. : Cenchrus longispinus (Hack.) Fernald, 1943

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.